دليل مدينة الشيخ زايد

دليل مدينة الشيخ زايد

مدينة الشيخ زايد مصر واحدة من المدن الجديدة اللي عليها إقبال كبير من السكًان المصريين والمستأجرين العرب وحتى المستثمرين الأجانب، بلغ عدد سكانها لحد الآن 150ألف نسمة. الإقبال الكبير اللي على المدينة ده ليه أسباب كتير:

• موقع المدينة: كتير بيعتبروا الشيخ زايد جزء من مدينة 6 اكتوبر! بس هي أصلًا مكانها على طريق مصر اسكندرية الصحراوي جنب “هايبر وان”. ممكن تروح من هناك لأي مكان أنت عاوزه في وسط البلد في أقل من نص ساعة عن طريق المحور وطريق الواحات والدائري ومصر اسكندرية الصحراوي.
• الخدمات: المدينة فيها كل الخدمات اللي ممكن أي حد يحتاجها بداية من المدارس والجامعات ووسائل المواصلات وأماكن للفسح والخروج والمستشفيات والعيادات وكمان دور العبادة زي: مسجد الشيخ زايد.
• التصميم: مدينة الشيخ زايد فيها أكتر من 20 حي متقسمين إلى أحياء متوسطة وفوق المتوسطة وأحياء فاخرة؛ وكل حي ليه المراكز الخدمية والترفيهية الخاصة بيه. ده غير أن المدينة فيها مساحات خضراء واسعة وممرات للمشي.

ورغم كده كتيرمن اللي عاوزين يسكنوا في مدينة الشيخ زايد بيشتكوا من غلو أسعار الشقق. وكتير من السكًان مش عارفين إيه أحلى أماكن للخروج والفسح هناك وفين أماكن المراكز الخدمية بالضبط. طيب في الأول خلينا نتكلم عن عقارات الشيخ زايد:

أولًا: شقق للبيع بالشيخ زايد

لو بتدور على شقق للبيع فى الشيخ زايد 2016 وعاوزها في حدود الميزانية ولنفرض 150,000  جنيه، يبقى أنت كده هتدور في الأماكن الخاصة بإسكان الشباب وشقق الجهاز الموجودة في:

• الحي الأول والثالث وال 11 وال 13 وال 16: شقق بنك التعمير والاسكان وشقق جهاز مدينة الشيخ زايد واسكان مبارك للشباب.

مساحات الشقق بتبدأ من 87 إلى 108 متر مربع. الحي ال 11 بالذات فيه شقق أسعارها بتبدأ من 70,000 جنيه بس مساحة الشقق صغيرة ما بين 70 إلى 75 متر مربع.

• مشروع بدر الدين في الحي 3 وال 16 ومدينة المستقبل.
• روضة زايد ومستقبل درة: من الأحياء السكنية المتوسطة الموجودة في مدينة الشيخ زايد واللي بيبدأ سعر الشقة فيها من 170,000 جنيه والقسط فيها بيبدأ من 800 جنيه مع مقدم 10% وقسط ربع سنوي.

أما لو ميزانيتك بتبدأ من 400,000 جنيه يبقى هتدور في الأحياء المتوسطة:

• الحي الثاني والحي الرابع: المشهروين بعمارات الأهالي (عمارات خاصة بالشركات والأفراد) فيها شقق سكنية بمساحات مختلفة.

طبعًا لو ميزانيتك تسمح  وعاوز تسكن في حي من الأحياء الراقية زي:

• الحي الثامن أو أي كمبوند هناك زي: بيفرلي هيلز وآلجريا ويست تاون وبالم هيلز. سعر المتر هناك بيبدأ من 8000 جنيه.

ثانيًا: أماكن الخروج والفسح

احنا المصريين خروجتنا لازم يبقى فيها أكل. وعلشان مش كل الأكل يتاكل جبنالكم ايه أكتر أماكن حلوة في الشيخ زايد فيها مطاعم بأسعارها. كتير من سكًان الشيخ زايد بيبقوا عاوزين يخرجوا في أماكن جديدة غير “مول العرب”. أكتر مكان مشهور في زايد فيه مطاعم كتير متنوعة وأكلها  حلو هو “أركان مول” .

• للناس اللي بتحب البيتزا والأكل الإيطالي عمومًا هتلاقوا Crave و Golio’s وMasion Thomas وأسعارهم بتبدأ من 70 جنيه للفرد.
• لو عاوز تفطر الصبح حاجة خفيفة في مكان حلو ممكن تروح TBS هناك كرواسون وباتيه وكيكات وأسعاره بتبدأ من 12 للفرد.
• لو عاوز تقعد مع أصحابك على كافيه هتلاقي Coffee Shop Company وستار بكس وHarris Cafe وأسعارهم عادية، يعني ممكن تدفع 75 جنيه للفرد.

لو عاوز تخرج برة الشيخ زايد وتاكل في مكان حلو: ” أندريا ” في نيو جيزة بعيد عن زايد ب 10 دقائق بس. ده مكان حلو لتجمع عائلي وأسعاره بتبدأ من: 150 جنيه للفرد.

أما بقى لو عاوز تجدد وتخرج خروجة غير تقليدية ممكن تروح “أفريكا بارك” أول حديقة حيوان مفتوحة في مصر، موجودة في الكيلو 65 طريق مصر اسكندرية الصحراوي؛ وفيها فندق جوة ممكن تقعد فيه.

أما لو بتحب الأفلام وبتابع الBox office والأفلام اللي بتنزل جديدة عندك: سينما iMax  في مول أمريكانا بلازا وسينما Galaxy في مول العرب

ثالثًا: المدارس والجامعات

من أكتر الحاجات اللي بتميز مدينة الشيخ زايد هي أن مدارس ولاك وجامعاتهم جنب البيت فمش هتقلق عليهم من الطريق. مدينة الشيخ زايد فيها مجموعة متنوعة من المدارس الدولية والخاصة والحكومية زي:

• المدرسة البريطانية الدولية في القاهرة – أميريكان إنترناشونال سكول – الكلية الدولية الكندية  – مدارس الرؤية الجديدة الدولية- مدرسة بيفرلى هيلز للغات – المدرسة الفندقية – المعهد الأزهرى – المدرسة النموذجية – مدرسة عمر بن الخطاب – مدرسة الشيخ زايد الثانوية بنين – مدرسة عمرو بن العاص -مدرسة الشيخ زايد الثانوية بنات – مدرسة أبو بكر الصديق – مدرسة الامل – مدرسة الشيخ زايد للتعليم الأساسي. والمدرسة البريطانية الدولية في مصر BSE